شقه وعروسه يارب
بقلم : علاء السيد النفيلى
فوجئنا بإطلاله من إطلالات السيد النقيب الفاضل على صفحات المنتديات تفاجئنا بعروسه لابسه الطرحه ورايحه على برج العرب متهنيه بشقه جديده وبمقدم فى إيدى وأيدك ألفين جنيه يابلاش وعلشان تحجز فيها لازم يكون سنك عشر سنوات .. يعنى إحجزها لأبنك يابيه .. وأستنى كمان وكمان مالناس فى الجيزه بقلها تسع سنوات وهى صابره ومستنيه الشقه تخدها وتقعد فيها لكن الى حاجزها أتجوز وقعد فى حتة تانيه وباع الوصل لكام واحد تانى .. يعنى بعدماتتسلم هتلاقى الميكانيكى والكهربائى والأسطى بليه قاعد فيها ومش هتلاقى محامى فيها إلا المكتوب على اليافطه ياباشا.
وعلشان هو بيحبنا وبيدور على ودنا راح حاطط الأساس فى حتة تانيه وقال الشقه بمقدم ألفين جنيه والغاوى ينقط بطاقيته عشان الطاقيه رايحه حتة تانيه وبعد ماتدوب نجيب له طاقيه من مدينة تالته ماحنا قلنا الحكايه قبل كده عايزين سيادتك نقيب مش وزير إسكان .. لأن مطلوب منك ياباشا حل مشكلة الشبان عشان يقدر يجيب الألفين جنيه يدفعه لسيادتك لزوم الشقه بتاعتك ولتحقيق هذا فلابد من تفعيل هذا النص الموجود فى قانون المحاماه رقم 197 لسنة 2008 ورقم الماده مش هاخبيه عليك هو رقم 29 وبيقول (( على كل محام من المقيدين أمام محكمة النقض أو من المقيدين أمام محكمة الإستئناف أن يلحق بمكتبه محاميا تحت التمرين على الأقل ، ويحدد مجلس النقابه العامه سنويا الحد الآدنى للمكافأه التى يستحقها المتدرب فى ضوء المتغيرات الاقتصاديه )) أنتهت الفقره.
لكن أين أنت من هذه الفقره ومن الشباب بالرغم من أنها أنصفت الشباب .. فهل دعوت المجلس للأنعقاد لتحديد المكافأه التى يستحقها المتدرب بالطبع لا ..وعشان كده الشباب تايه ومش لاقى القرش صاغ لأن الغالبيه بتدرب من غير قرش ولاصاغ ، فياريت تكون الهمه وتروح وتصدر كام قرار بتحديد المكافأت وأنت تلاقى الشباب ملموم حاوليك وبيسقف ويدعيلك ويقول عاش ناصر الشباب .. لكن أنا حاسس إنك
خايف من إصدار مثل هذا القرار لأن هاتبقى حو ليك هوجه مش هتقدر تخرج منها بسلام.
أنت بتقول غيرك مانعك من الأعمال وبيحاربك فى كل مكان سيبك من الى جرى والى كان ولو عايز تبهر الشباب ماعليك إلاتفعيل القانون هنا وهناك بدل ماتقول راح أغير فى المكتوب وأطلع قانون جديد تفصيل لسيادتك مالوش حدود فى السر بتسربه
من غير ماتعرضه علينا ، وكمان ياباشا شوف تانى موضوع المعاشات لأن الميت مات وولاده محتاجين إعانات والغلاء شادد حيله والموجود مايكفى عيش حاف ، دور ولف ودور على أى مصدر يمكن تلاقى وتعدل نص يزود الأيرادات ويخلى عيشة المحامى عيشه هنيه فى حياته وبعد مماته بدل ماأنت ماشى وعامل نفسك وزير إسكان لأنك لوحليت الأزمه يبقى وزير الأسكان مالوش لزمه ويخدوك بدل منه وزير وياريت تحل الأزمه عشان تبعد عن النقابه ويعينوك وزير يمكن حالنا يبقى أحسن من الغفير مش كده ولاأيه ياسيادة النقيب